Ukraina prezidenti Pyotr Poroshenkoning ma’lum qilishicha, prezident bo‘lguniga qadar o‘ziga tegishli bo‘lgan biznes-mulklarni hozirgi vaqtda G‘arb investitsiyaviy kompaniyalari boshqarmoqda. Bu haqda “Korrespondent.net” xabar bermoqda.

Foto: Korrespondent.net

Foto: Korrespondent.net

Uning so‘zlariga ko‘ra, u o‘z biznesidan “ko‘ngilli ravishda uzoqlashgan”. Ayni vaqtda, u o‘z mulklarini aynan qaysi kompaniyalar boshqarayotganiga aniqlik kiritmadi.

Poroshenkoning qo‘shimcha qilishicha, uning prezidentlik faoliyati mulkiy manfaatlari bilan bog‘liq emas. O‘z navbatida, u “badavlat odamlar siyosat bilan shug‘ullanish imkoniga egaligini normal holat” deb hisoblaydi.

Iyul oyida Poroshenko, aksiyadorlar orasida uning familiyasi bo‘lmasligi uchun, Roshen kompaniyasini ishonchli boshqaruv asosida Rothschild Investment’ga topshirishini ma’lum qilgandi.

“Forbes Ukraina” nashri tomonidan mart oyida e’lon qilingan Ukrainaning eng boy odamlari reytingida Poroshenkoning boyligi 750 million dollar deb baholangandi.