Davomi: O‘zbekistonda koronavirus aniqlandi, Navro‘z bekor qilindi, maktab va bog‘chalar ta’tilga chiqdi. Asosiy ma’lumotlar

O‘zbekistonda barcha maktabgacha ta’lim muassasalari, maktablar va oliy ta’lim muassasalari koronavirus tarqalishiga qarshi profilaktika maqsadida 16-martdan e’tiboran karantinga yopiladi.

Bu haqda 15-mart, yakshanba kuni, O‘zbekiston bosh vaziri Abdulla Aripov ishtirokidagi yig‘ilishda ma’lum qilingan. Manbalarning ta’kidlashicha, ta’lim muassasalaridagi karantin uch haftagacha davom etishi mumkin.

Avvalroq, 15-mart kuni O‘zbekistonda koronavirusga chalingan ilk bemor aniqlangani, u Toshkentda istiqomat qiluvchi ayol ekani, 11-mart kuni Fransiyadan qaytgani haqida xabar berilgan edi.

So‘nggi ma’lumotlarga ko‘ra, bemor ayolning barcha oila a’zolari tibbiy kuzatuvga olingan, shuningdek, u bilan birga bir reysda uchib kelgan 48 yo‘lovchi va 9 nafar ekipaj a’zosi ham nazoratga olinmoqda.

Mavzuga doir: O‘zbekistonda koronavirus qayd etilganidan so‘ng Toshkentda niqob taqib yurganlar soni ko‘paydi (fotoreportaj)