Telegram’da kuchli yomg‘ir tufayli hosil bo‘lgan sel mollar podasini oqizib ketayotgani aks etgan video tarqaldi.

Skrin: “Daryo”

Jizzax viloyatining Sharof Rashidov tumanida yuzaga kelgan tabiiy ofat oqibatida selda oqib ketayotgan o‘nlab mollarni qutqarishning iloji bo‘lmagan.

Favqulodda vaziyatlar vazirligi hali mazkur video yuzasidan rasmiy munosabat bildirgani yo‘q, vazirlik o‘z sahifalarida 1—2-may kunlari O‘zbekiston hududiga Turkmaniston orqali Kaspiy dengizining janubiy tumanlari ustida shakllangan nam havo oqimi kirib kelishi kutilayotgani haqida xabar bergandi.

Avval kuchli shamol Farg‘onada ham elektr ta’minotidagi uzilishlarga sabab bo‘lgani xabar qilingandi. Undan oldin Buxoroda yuz bergan kuchli shamol oqibatida bir kishi halok bo‘lgani, 41 kishi jarohatlangani, shamoldan so‘ng Buxoro, Navoiy, Sirdaryo va Samarqanddagi salkam 140 ming xonadon gazsiz qolgani, Buxoro kuchli shamoldan so‘ng elektr ta’minotida eng katta talafot ko‘rgani haqida xabarlar berilgan.

Prezident Shavkat Mirziyoyev Buxoroda yuz bergan kuchli shamol oqibatlarini ko‘zdan kechirish uchun viloyatga tashrif buyurgan hamda Olot va Qorako‘lda tabiiy ofat oqibatlarini ko‘zdan kechirgan.

Buxoroda 27-aprel shamolidan so‘ng Qorako‘l va Olot tumanlari bilan aloqa uzilib qolganidan keyin Qorako‘l va Olotda toshqin haqida asossiz mish-mish tarqalgan va tuman aholisi 28-aprel kuni o‘z xonadonlarini tark eta boshladi. Ijtimoiy tarmoqlarda traktor tirkamasida Buxoro shahri tomon ketayotgan qorako‘lliklar videosi ham paydo bo‘lgan. Keyinroq suv toshqini haqida yolg‘on xabar tarqatgan shaxslar aniqlandi.