“Milliy tiklanish” partiyasi 1-may kuni Toshkentdagi “Xalqlar do‘stligi” (sobiq “Istiqlol”) san’at saroyi oldida tashkil etilgan ochiq konsert vaqtida Sovet Ittifoqi bayrog‘i ko‘tarilganini keskin qoralaydi. Partiya yetakchisi, Oliy Majlis Qonunchilik palatasi spikeri o‘rinbosari Alisher Qodirovning qo‘shimcha qilishicha, bu qizil bayroqning ko‘tarilishi “g‘arazli provokatsiya” bo‘lgan.

“Biz san’atga qarshi emasmiz, san’atni siyosatga qurol qilinishiga qarshimiz. Taraqqiyparvar o‘zbek ziyolilari va oqko‘ngil ajdodlarimizning qoniga bo‘yalgan bosqinchi sovet davlati bayrog‘ini mamlakatimiz poytaxtining qoq markazida baland ko‘tarilishini o‘zbek xalqiga nisbatan haqorat deb hisoblaymiz”, — deb yozgan Alisher Qodirov ijtimoiy tarmoqlardagi sahifalarida.

“Milliy tiklanish” partiyasi yetakchisi Bosh prokuraturadan “bu provokatsiya”ga tegishli baho berishni so‘ragan.

Ma’lumot uchun, 1-may kuni “Istiqlol” san’at saroyi oldidagi maydonda “Xor Turetskogo” jamoasi va Soprano guruhining “G‘alaba qo‘shiqlari” deb nomlangan konsert dasturi taqdim etilgan. Ta’kidlanishicha, konsert dasturi Rossiyaning O‘zbekistondagi elchixonasi va “Rossotrudnichestvo”ning O‘zbekistondagi vakolatxonasi tomonidan Moskva ma’muriyati, Rossiya Tashqi ishlar vazirligi, “Obsheye delo” xayriya fondi, O‘zbekiston hukumati va Madaniyat vazirligi ko‘magida o‘tkazilgan.

Foto: Facebook / @uzbrsgov

Konsert davomida tashrifchilarning biri tomonidan Sovet Ittifoqi bayrog‘i baland ko‘tarilgan; “Rossotrudnichestvo” tomonidan ushbu holat aks etgan suratning e’lon qilinishi ijtimoiy tarmoqlarning o‘zbek segmentida muhokamalarga sabab bo‘lgan.