O‘n yildan ko‘proq otasining vasiyligi ostida bo‘lgan va ozodlikka erishish arafasida turgan xonanda Britni Spirs shaxsiy hayotida ham o‘zgarish qilishga qaror qildi.
Foto: Elle
Qo‘shiqchi Instagram’dagi sahifasi orqali unashtiruvini e’lon qildi. U yaqin orada model va fitnes bo‘yicha trener Sem Asgari bilan turmush qurishi mumkin. Qaylig‘i bilan birga ko‘rinish berib, brilliantdan ishlangan uzugini muxlislariga ko‘z-ko‘z qilgan Spirs videoga izoh sifatida bunga ishonmayotganini yozib qoldirgan.
Foto: Elle
Ushbu zargarlik buyumi Forever Diamonds NY brendi dizayneri Roman Malayev tomonidan taqdim qilingan. Uzuk 4 qirotlik tosh bilan bezalgan.
Britni bo‘ynidagi choker, qizil french manikyuri hamda yangi soch turmagi bilan ko‘rinish bergan. Sochlarining uchini qirmizi rangga bo‘yab, nomiga jingalak qilgan.
2016-yildan buyon munosabatda bo‘lgan juftlik Slumber Party qo‘shig‘ining klipida tanishgan. Britni hayotidagi qiyinchiliklar vaqtida Sem hamisha uning yonida bo‘lib, qo‘llab-quvvatlagan. Avvalroq Britni Spirsning otasi qiziga vasiylik qilishdan voz kechish uchun 2 million dollar talab qilgani haqida xabar berilgandi.