Ўзбекистон Олий Мажлиси Сенати тўртинчи ялпи мажлисининг биринчи иш кунида сенаторлар «Электрон ҳукумат тўғрисида»ги қонунни кўриб чиқди. ЎзА хабарига кўра, қонун сенаторлар томонидан маъқулланди.

Foto: O‘zA

Фото: ЎзА

Қайд этишларича, ушбу ҳужжат аҳолига, жисмоний ва юридик шахсларга ахборот-коммуникация технологияларидан (АКТ) кенг фойдаланиш орқали давлат хизматларини кўрсатиш тизимини такомиллаштиришга қаратилган.

Қонун «электрон ҳукумат» фаолиятини ташкил этишнинг давлат органлари фаолиятининг очиқ-ошкоралиги, даъво қилувчиларнинг электрон давлат хизматларидан тенг фойдаланиши, ахборот хавфсизлигини таъминлаш каби принсипларини мустаҳкамлайди.

Қонун шу жумладан, «бир дарча» принсипи асосида электрон ҳужжат алмашиш имкониятларини кенгайтиради, аҳоли ва тадбиркорлик субъектлари билан ўзаро алоқанинг механизмларини яратишни, электрон давлат харидлари тизимини ривожлантиришни назарда тутади.

Қонунда Вазирлар Маҳкамаси, давлат ҳокимияти ва бошқаруви органларининг ваколатлари, шунингдек, фуқаролар, жисмоний ҳамда юридик шахсларнинг ушбу соҳадаги ҳуқуқлари, «Электрон ҳукумат» фаолиятининг тартиби, инфратузилма хусусиятлари белгилаб берилмоқда.

Сенаторларнинг фикрича, «Электрон ҳукумат тўғрисида»ги қонуннинг кучга кириши турли маъмурий тартиб-таомилларни янада енгиллаштириш, давлат ҳокимияти ва бошқаруви органлари фаолиятининг очиқлиги ҳамда ошкоралигини таъминлаш учун ҳуқуқий асос яратади.