Ўзбекистонда қолипли нон (буханка) нархи яна қимматлашди. Бу «буханка»нинг сўнгги 20 кун ичида иккинчи марта қимматлашиши ҳисобланади.

Фото: «Aniq.uz»

Ҳозирда Тошкентдаги турли савдо дўконларида «буханка» 1 600 сўмдан 1 900 сўмгача сотилмоқда.

«Буханка» нархи охирги марта 15 октябрь куни қимматлашган. Ўшанда «буханка» 1350—1500 сўмдан сотила бошланган эди.

2019 йил 14 октябрь куни Вазирлар Маҳкамасининг «Дон, ун ва нон етказиб бериш тизимига бозор механизмларини тўлиқ жорий этиш чора-тадбирлари тўғрисида»ги қарори қабул қилинди.

Қарорга мувофиқ, 2019 йил 15 октябрдан:

  • 2019 йил ҳосилидан тайёрланган ва ун ишлаб чиқаришга мўлжалланмаган буғдой ғалла истеъмолчиларининг барча тоифаларига фақат биржа орқали сотилади;
  • давлат харидлари доирасида сотиб олинган буғдойни қайта ишлашдан олинган ун барча истеъмолчиларга 100 фоиз тўловни олдиндан амалга ошириш орқали очиқ биржа савдоларида сотилади;
  • 2019 йил ҳосилидан тайёрланган буғдойнинг бир тоннаси ун ишлаб чиқаришга 1,3 миллион сўмдан улгуржи нархда сотилади.

2019 йил 1 октябрдан бошлаб ун ва қолипли нон харид қилиш бўйича қўшимча харажатларни қоплаш учун аҳолининг ижтимоий ҳимояга муҳтож бўлган айрим тоифаларига бериладиган ҳар ойлик пул компенсацияси оширилиб, 50 000 сўм миқдорида белгиланди.