Бандлик ва меҳнат вазирлиги ходимларини пахта теримига мажбуран жалб қилган Нукус шаҳар 1-сонли болалар ва ўсмирлар спорт мактаби ҳамда Хўжайли туманидаги 31-умумтаълим мактаб раҳбарларини Маъмурий Жавобгарлик тўғрисидаги кодекснинг 51-моддаси 1-қисми билан жаримага тортди.

Фото: Бандлик ва меҳнат муносабатлари вазирлиги матбуот хизмати

Шунингдек, вазирлик томонидан яна бир нечта пахта теримига мажбуран жалб қилиш ва пахтачиларга етарли шарт-шароит яратмаслик ҳолатлари аниқланди.

Жиззах вилояти Арнасой тумани АТБ «Халқ банки» бошқарувчиси, ҳудуд Тиббиёт бирлашмаси бош врачи, «Сувоқава» ДУК Арнасой тумани филиали бошлиғи ҳам қўл остидаги ходимларни пахта теримига мажбуран йўналтиргани туфайли МЖтКнинг 51-моддаси 1-қисми билан базавий ҳисоблаш миқдорининг 10 баробари қийматида жаримага тортилди.

Жиззах вилояти Дўстлик туманида жойлашган «Севдиёт» фермер хўжалиги раҳбарига теримчилар учун етарли шарт-шароитлар яратиб бермагани сабаб МЖтКнинг 49-моддаси 1-қисми билан маъмурий жарима қўлланилди.

Фото: Бандлик ва меҳнат муносабатлари вазирлиги матбуот хизмати

Қашқадарё вилояти Миришкор тумани Ирригация бўлими бошлиғи ходимларни пахта йиғим терим вақтида бажарилмаган иш ҳажмлари учун пул маблағлари тўлаб берган. Бу ноқонуний ҳаракат МЖтКнинг 49-моддаси 1-қисми билан жаримага тортилди.

Қарши шаҳри «Обод» автотранс МЧЖ директори эса йўналиш бўйича йўловчиларни ташишни амалга оширувчи Damas русумли автомобиль ҳайдовчиларини уларнинг розилигисиз пахта далаларига теримчиларни ташишга мажбурлагани сабаб базавий ҳисоблаш миқдорининг 10 баробари қийматида маъмурий жарима тўлайдиган бўлди.

Тошкент вилояти Оҳангарон тумани ҳокимининг қишлоқ ва сув хўжалиги масалалари бўйича ўринбосари, Жиззах вилояти Зафаробод тумани Иқтисодиёт ва тадбиркорлик масалалари бўйича ҳоким ўринбосари, айни вилоятнинг Мирзачўл тумани қурилиш ишлари бўйича ҳоким ўринбосари теримчилар учун етарли шарт-шароитларни яратмаганлиги сабабли маъмурий жаримага тортилди.

Бу қаторда Андижон вилояти Улуғнор тумани ҳокимининг биринчи ўринбосари ҳам бор. У пахта териш учун келган ишчиларнинг ётоқ жойида етарли шарт-шароитларни яратмаган ва базавий ҳисоблаш миқдорининг 7-10 баробари қийматида маъмурий жаримага тортилган.

«Ўзбекистон Республикасида мажбурий меҳнатнинг ҳар қандай шакли қонунга хилофдир! Агар Сизни пахта терими ёки бошқа бирор ишга мажбурлашса ёки шундай ҳолатга дуч келсангиз, Давлат меҳнат инспекциясининг 1176 қисқа рақамларига, ‘dmi.mehnat.uz’ сайти ёки меҳнатҳуқуқбот Telegram ботига мурожаат қилинг!», — дейилади хабарда.