Январь ойида Ўзбекистонга 2659 нафар хитойлик сайёҳ ташриф буюрди. Бу 2019 йилнинг январига нисбатан 15,9 фоизга кўп, дея хабар бермоқда Туризмни ривожлантириш давлат қўмитаси.
Фото: «Дарё»
Умуман олганда, 2020 йилнинг январида Ўзбекистонга 538 360 нафар чет эллик келган бўлиб, бу ўтган йилнинг шу давридаги кўрсаткичга нисбатан 23,1 фоизга кўп. Уларнинг аксарият қисми — 514 774 нафари, ҳар доимгидек, МДҲ мамлакатларидан. Узоқ хориждан 23 586 киши келган.
Биринчи ўринда — Қозоғистон, у ердан 164 100 киши келган. Иккинчи ўриндан Тожикистон (137 298 киши), учинчи ўриндан эса Қирғизистон (121 856 киши) ўрин олган.
Туркманистон (118,4 фоизга), Бангладеш (200 фоизга), Бразилия (266,7 фоизга), Ирландия (383,3 фоизга), Шри-Ланка (600 фоизга), Мўғулистон (1333,3 фоизга) ва Вьетнамдан (1425 фоизга) келувчилар сони кескин ошган.
Аввалроқ коронавирус сабаб Ўзбекистон хитойлик сайёҳларнинг бир қисмини йўқотиши мумкинлиги, боиси хитойликларга хорижий тур-пакетлар сотиб олиш ва чет элда меҳмонхоналарни брон қилиш тақиқлангани ҳақида хабар берилган эди.
Мавзуга доир: Ўзбекистон иқтисодиёти Хитойдаги коронавирус туфайли қийин шароитларга дуч келиши мумкин
Айни вақтда Тошкентдаги меҳмонхоналарнинг эгалари коронавирусдан Ўзбекистоннинг туризм соҳаси фойда кўриши, Хитойга сафар қилиш ниятида бўлганлар энди бошқа мамлакатларга, хусусан, Ўзбекистонга келиши мумкинлигини таъкидлаган эди.