Лексикографлар Оксфорд луғатининг сўз бойлигини қайта кўриб чиқди ва унга коронавирус пандемияси сабабли пайдо бўлган неологизмларни киритди, деб хабар беради The Guardian.

Фото: The Telegraph

Инглиз тилининг энг йирик луғати бўлган Оксфорд луғатида social distancing («ижтимоий масофаланиш»), self-isolation («ўзини яккалаш») каби тушунчалари ва WFH (work from home — «уйдан ишла») қисқартмаси пайдо бўлди.

«Бундай қисқа вақт ичида битта сўздан (COVID-19) фойдаланишнинг кескин ўсиши ва унинг тилда устунлик қилиши жуда камёб ҳодиса», — деб маълум қилган Оксфорд луғати муҳаррири Бернадетт Пэтон.

COVID-19 сўзининг ўзи қуйидаги таъриф билан неологизмлар қаторидан ўрин олган: «коронавирусни юзага келтирадиган, айниқса, кексалар ва ёндош касаллиги мавжуд кишиларда оғир ҳолатларга ва ҳатто ўлимга сабаб бўладиган, одамлардаги ўткир респиратор касаллик».

Қайд этилишича, бошқа кишилар каби лексикографлар ҳам уйдан ишламоқда. Улар пандемия сабабли юзага келаётган ўзгаришларни қайд этади ҳамда у ёки бу сўз ва бирикмани луғатга киритиш бўйича таклиф киритади.

Экспертларнинг маълумотларига кўра, айни пайтда коронавирус ёки COVID-19 фойдаланиш бўйича тилда устунлик қилмоқда. 2019 йил декабрь ойида Brexit ва «импичмент» сўзлари энг кўп қўлланилган. Январь ойида эса энг кўп ишлатилган сўзлар қаторидан «коала», bushfire (вайронкор ўрмон ёнғинлари), «Ироқ», «чигиртка» ва «қотиллик» сўзлари ўрин олган.