Президент Шавкат Мирзиёев раислигида 22 май куни Андижон шаҳрида ўтказилган йиғилишда вилоятда янги корхоналар ташкил этиш ва иш ўринларини кўпайтириш чора-тадбирлари муҳокама қилинди.

Фото: Президент матбуот хизмати

Президент матбуот хизматининг хабар беришича, 2020 йилда 789 та лойиҳа бўйича 7 триллион сўм инвестиция ўзлаштирилиб, 42 минг иш ўрни яратиш режалаштирилган.

Тўқимачилик йўналишида умумий қиймати 106 миллион доллар бўлган 13 та лойиҳа амалга оширилиб, ип-калавани қайта ишлаш даражаси 78 фоизга етказилади, 278 миллион долларлик экспорт таъминланади.

Қурилиш материаллари тармоғида 2020—2021 йилларда 74 лойиҳа самарасида 106 миллион долларлик импорт ўрнини босувчи маҳсулотлар ишлаб чиқариш йўлга қўйилади.

«Оилавий тадбиркорликка 353 миллиард сўм кредит, Тикланиш ва тараққиёт жамғармасидан 20 миллион доллар ажратилиши белгиланди», — дейилади расмий ахборотда.

Йиғилишда бўш турган бинолардан самарали фойдаланиш, қишлоқ хўжалигини ривожлантириш, аҳолини солиқдан озод қилинган 60 дан ортиқ турдаги касбга ўқитиш бўйича топшириқлар берилган.