Самарқандлик А. 2020 йилнинг 27 май куни Санкт-Петербургдан чартер рейс орқали Ўзбекистонга келган ва карантин марказида тиббий кузатувга олинганди. Унда 1 июнь куни COVID-19 инфекцияси тасдиқланиб, Тошкентдаги Вирусология илмий текшириш институти клиникасига ётқизилган.
Соғлиқни сақлаш вазирлигидан маълум қилишларича, коронавирус инфекциясига чалинган ушбу бемор (эркак) узоқ йиллар давомида ўткир лейкоз, сурункали анемия оғир даражаси ва нафас етишмовчилиги каби касалликлар билан даволаниб келган.
2020 йилнинг 1 июнь куни беморнинг аҳволи оғирлашиб, реанимация бўлимига ўтказилган. Шу кунгача унга бош мутахассислар томонидан консултациялар, Ўзбекистондаги тегишли ихтисослаштирилган тиббиёт марказларининг шифокорлари томонидан телемедицина орқали консилиумлар ўтказилиб, доимий назорати таъминланган.
Бироқ стандартлар бўйича кўрсатилган реанимацион муолажаларга қарамасдан бемор ўткир нафас ва юрак қон-томир етишмовчилигидан вафот этган. У коронавирусдан вафот этган Ўзбекистондаги 19-бемор бўлди.
Бунгача Ўзбекистонда 18 киши коронавирус инфекцияси асоратлари оқибатида вафот этган эди:
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган);
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан;
- 7 апрель куни коронавирусга чалинган 40 ёшли эркак юрак ва ўпка етишмовчилигидан;
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида;
- 14 апрель куни Наманган шаҳрида яшаган 73 ёшли Ш. юрак қон-томир етишмовчилигидан;
- 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан;
- 22 апрель куни Наманган шаҳрида яшаган 54 ёшли аёл ўткир нафас ва юрак қон-томир етишмовчилигидан;
- 24 апрель куни Ангренда коронавирус инфекцияси тасдиқланган бемор ўткир нафас, ўпка-юрак ва полиорган етишмовчилигидан;
- 29 апрель куни Тошкентда 61 ёшли Г. исмли бемор ўткир респиратор дистресс синдром, ўткир нафас етишмовчилиги, ўпка-юрак етишмовчилигидан;
- 3 май куни Наманганда М. исмли коронавирус инфекциясини юқтириб олган бемор ўткир нафас ва юрак қон-томир етишмовчилигидан;
- 15 май куни Самарқандда коронавирусга чалинган Ў. исмли иккинчи гуруҳ ногирони ўткир нафас ва юрак қон-томир етишмовчилигидан;
- 17 май куни коронавирусга чалингани Сурхондарёда аниқланган сирдарёлик I. исмли ҳайдовчи юрак қон-томир ва ўткир нафас етишмовчилигидан;
- 18 май куни коронавирусга чалинган самарқандлик бемор юрак қон-томир ва ўткир нафас етишмовчилигидан;
- 26 май куни Самарқанд вилоятининг Пахтачи туманида яшаган ва коронавирусга чалинган 63 ёшли бемор ўткир нафас ва юрак қон-томир етишмовчилигидан;
- 31 май куни Тошкент шаҳрида истиқомат қилган ва коронавирусга чалинган 63 ёшли Х. исмли аёл бош мия қон айланишининг ўткир бузилиши, ўпка-юрак етишмовчилигидан;
- 3 июнь куни Тошкент шаҳрида истиқомат қилган ва коронавирусга чалинган 72 ёшли М. исмли эркак ўпка-юрак етишмовчилиги, бош мия қон айланишининг ўткир бузилишидан;
- 6 июнь куни Тошкент шаҳрида истиқомат қилган ва коронавирусга чалинган 70 ёшли Ш. исмли эркак мия шиши, ўткир нафас ва юрак қон-томир етишмовчилигидан вафот этган.
- 8 июнь куни Тошкентда коронавирусга чалинган 76 ёшли Х. исмли эркак ўткир нафас ва юрак қон-томир етишмовчилигидан вафот этган.
Ўзбекистонда 10 июнь соат 17:00 ҳолатига кўра, коронавирус инфекциясига чалинганлар сони 4591 нафарга етди. Касалликдан соғайганлар эса жами 3532 нафарни ташкил қилмоқда.