Инглиз тилининг Merriam-Webster луғатида «ирқчилик» сўзининг таърифи ўзгартирилади. Бу ҳақда луғатнинг бош муҳаррири Питер Соколовски маълум қилди, деб ёзмоқда CNN.

Фото: UPI

Бу қарор миссурилик Кеннеди Митчем билан олиб борилган ёзишмалардан кейин қабул қилинган.

Ирқчиликнинг луғатдаги ҳозирги таърифи қуйидагича: «Ирқчилик — ирқ инсоннинг хусусиятлари ва қобилиятларини ҳал қилувчи асосий омил эканлигига ва ирқий тафовутлар у ёки бу ирқнинг устунлигини келтириб чиқаришига бўлган ишонч».

Митчем Merriam-Webster таҳририятига мактуб ёзган ва ирқичилик шунчаки нотўғри тушунча эмас, балки нафратнинг тизимли равишда юзага келиши эканлигини аниқ кўрсатишни сўраган. Луғат муҳаррирлари бунга розилик берган.

Соколовскининг айтишича, луғат ирқчиликни «доктрина ёки сиёсий дастур», шунингдек, ирқчилик фаразларига асосланган «сиёсий ёки ижтимоий тизим» сифатида ҳам таърифлайди.

Унинг тушунтиришича, луғатнинг чоп этиладиган талқини китобга кўп сўзни жойлаштириш керак бўлгани сабабли қисқа таърифдан фойдаланади. Онлайн луғатда эса чеклов йўқ. Merriam-Webster бир йилда 2-3 марта янгиланади, ирқчиликнинг янги таърифи янгиланган талқинда чиқади.

Merriam-Webster’нинг қарори АҚШда полиция зўравонлиги ва ирқчилик сабабли юзага келган норозиликлар билан бир вақтга тўғри келди. Намойишлар полиция томонидан қўлга олиниши вақтида жабрланиб вафот этган афроамерикалик Жорж Флойднинг ўлимидан кейин бошланди.