Вьетнамлик уста ёғоч бўлагидан Lamborghini Aventador S’нинг аниқ нусхасини яратди (видео)

YouTube’даги WoodWorking Art каналининг ветнамлик муаллифи ёғоч бўлагидан Lamborghini Aventador S нусхасини ясади. Ўйинчоқ моделнинг «подвеска»си ишлайди, эшиклари, капот ва юкхонаси очилади, салони, ғилдирак дискалари ва ёруғлик техникалари майда деталларига қадар ишланган, деб хабар беради Motor.

Дурадгор блогер бир неча соатлик меҳнати маҳсулини 11 дақиқали видеороликка жойлаштирган бўлиб, у машинани ясашда 1:13 масштабга риоя қилишга уринган.

Уста ўзининг ўйинчоқ моделини яратишда оддий дурадгорлик ускуналари — фрезали станок, дрель, силлиқловчи машина ва исканадан фойдаланган. Шу сабабли ёғоч суперкар пластмасса моделдан қайсидир даражада ортда қолади, аммо блогернинг майда эҳтиёт қисмларга бўлган эътибори ҳайратланарли. Янги модель чиройли кўриниш касб этиши учун лак ва бўёқларга бўялган.

Аввалроқ вьетнамлик уста 1:13 масштабда ёғочдан яратилган ўзининг сўнгги иши — Ford Ranger Raptor моделини сотувга қўйгани тўғрисида хабар берилганди. У пикапни яратишга 35 кун сарфлаган ва уни 2 минг долларга сотишга тайёрлигини билдирган.