Видео: Кўча ўртасида турли бўёқлар билан безатилаётган Lamborghini Aventador SVJ

Саудия Арабистонида Абдулла Кандил исмли рассом Lamborghini Aventador SVJ суперкарига ўзига хослик тақдим этишга қарор қилди. Бироқ у Lamborghini Ad Personam студияси мутахассисларига мурожаат қилиш ўрнига, машинани ўзи безаган ва буни кўчада, одамларнинг кўз ўнгида амалга оширган. Машаққатли ижодий жараённинг бир қисми тасвирланган видеоролик YouTube’даги Supercars of Austria каналида пайдо бўлган, деб ёзади Motor.

Lamborghini Aventador SVJ’нинг 33 ёшли эгаси ролик учун Монте-Карлодаги беш юлдузли Hotel de Paris меҳмонхонаси олдидаги кўчани танлаган. Суперкарини автотураргоҳга жойлаштирган рассом уни бўяшга киришган. У ўзининг Superveloce Jota’си учун ҳақиқий мой бўёқни танлаган бўлиб, автомобилдан уни тозалаш учун оригинал лак бўёқ қопламасини ҳам кўчириш керак бўлади.

Натижада турфа рангли бўёқлар билан нафақат Aventador кузови, балки салоннинг баъзи қисмлари ҳам бўялган. Кадрлардан кўриш мумкинки, оқ рангли чизиқ ва ғалати нақшлар олд панел, марказий тоннел ва ҳатто ўриндиқда пайдо бўлган.

Motor1 нашрининг ёзишича, Кандил бундан олдин Porsche 911 GТ3 моделини ҳам ўзига хос тарзда бўяган.

Эслатиб ўтамиз, 2021 йилнинг апрелида Sotheby’s аукциони орқали кузови дунёга машҳур америкалик фотореалист-рассом Ричард Филлипснинг Queen оf the Night деб аталувчи иши билан безатилган Porsche Taycan сотувга қўйилганди.