Глобал инфляция жорий йилнинг учинчи чорагида энг юқори чўққисига чиқади ва кейин пасайишни бошлайди. Бу ҳақда Focus Economics таҳлилчилари прогноз қилмоқда.
Фото: Bloomberg
Талабнинг заифлашиши инфляциянинг секинлашишига олиб келади — бу аллақачон металл нархлари динамикасидан кўриниб турибди.
Таҳлилчилар келгуси йилда хом ашё нархи пасайишда давом этишини тахмин қилмоқда.
Бундан ташқари, логистика чекловлари ҳам юмшаб бормоқда — энди юк ташиш нархи йил бошига нисбатан икки баравар арзонроқ.
Яримўтказгичлар ишлаб чиқаришнинг кўпайиши уларнинг бозордаги тақчиллигининг қисқаришига олиб келади.
Нархлар ўсишининг секинлашувига дон савдоси ҳам сабаб бўлди: май ойидан бери буғдой нархи учдан бирга, маккажўхори эса 10 фоизга арзонлашди.
Таҳлилчиларнинг 60 фоизга яқини асосий про-инфляция хавфини Россия газининг Европага етказиб беришнинг тўлиқ тўхтатилиши деб атайди.
Уларнинг 9 фоизи об-ҳаво шароитини асосий хавф деб атади — Европадаги совуқ қиш энергия нархининг ошишига олиб келиши мумкин.
Бошқа ҳудудлар қурғоқчилик ёки сув тошқинларидан азият чекмоқда, бу эса озиқ-овқат таъминоти ва гидроэнергетика ишлаб чиқаришни қисқартириш билан таҳдид қилмоқда.
Респондентларнинг яна 9 фоизи ривожланган мамлакатлардаги ишсизлик даражасининг пасайиши ҳисобига иш ҳақининг ўсишини асосий хавф деб атаган.
Инфляциянинг мумкин бўлган секинлашувининг асосий омили глобал рецессия ҳисобланади — буни таҳлилчиларнинг 68 фоизи таъкидлаган.
Яна 22 фоизи Россия ва Украина ўртасида тинчлик келишувига эришиш буғдой нархининг кескин пасайишига ва Россия газининг Европага етказиб берилишининг ошишига олиб келиши мумкинлигини, 3 фоизи эса Эрон билан ядровий келишувга эришиш нефть нархини пасайтириши мумкинлигини таъкидлади.