Ўзбекистонда чорвачилик тармоғига Жаҳон банкининг 300 млн доллар имтиёзли кредити ажратилади. Бу ҳақда Ветеринария ва чорвачиликни ривожлантириш давлат қўмитаси раиси ва Жаҳон банкининг Европа ва Осиё минтақаси қишлоқ хўжалиги ҳамда озиқ-овқат масалалари бўйича бўлими раҳбари ўртасида бўлиб ўтган учрашувда маълум қилинди.

Фото: «Дарё» / Мадина Нурман

Қайд этилишича, Жаҳон банки иштирокидаги «Ўзбекистонда чорвачилик соҳасини ривожлантиришнинг иккинчи босқич лойиҳаси»нинг умумий қиймати 300 млн долларни ташкил этади. 

Лойиҳани тайёрлаш ишлари декабрь ойида якунига етади ва йил охирига қадар дастлабки келишув ишлари амалга оширилади. 

Айни пайтда режалаштирилган лойиҳа доирасида инфратузилмани ривожлантириш бўйича чорвачилик мажмуаларини «фойдаланишга тайёр ҳолда» ташкил этиш ва мажмуаларни лизинг шартлари асосида хусусий секторга ўтказиш бўйича чора-тадбирлар амалга оширилмоқда. 

Шунингдек, ушбу ёндашув асосида тадбиркорларга ер ажратиш масалаларини ҳал этиш, улардан гаров таъминотини талаб қилмаслик ва иқлим талабларига мос замонавий чорвачилик мажмуаларини ташкил этиш бўйича қўмита мутахассислари таклифи тақдим этилди.

Жаҳон банки ҳамкорлигида амалга оширилаётган «Ўзбекистонда чорвачилик соҳасини ривожлантириш лойиҳасининг биринчи босқичи»да мазкур халқаро молия институтининг имтиёзли маблағлари ҳисобига Ўзбекистоннинг чорвачилик ва унинг тармоқларида қарийб юз мингга яқин янги иш ўрни яратилган.